Programa de Desenvolvemento Estratéxico

O equipo directivo da Escola de Enxeñaría de Minas e Enerxía manifesta o seu compromiso coa calidade, a excelencia e a mellora continua do centro e, particularmente, das titulacións impartidas no mesmo, así coma a importancia da posta en marcha dunha estratexia abordada de forma participativa e colaborativa tendo en conta a contorna do centro e os principais retos futuros no escenario tecnolóxico, social, ambiental e económico actual.

O Programa de Desenvolvemento Estratéxico da Escola estrutúrase, de xeito análogo ao Plan Estratéxico da Universidade de Vigo (2021-2026), arredor de cinco eixes estratéxicos:  formación impartida, relación da universidade coa sociedade, investigación e transferencia, organización dos recursos propios e recursos humanos. Ademais, establécense nel a Política e Obxectivos de calidade do centro.

Con relación ao proceso de elaboración do PDE, seguíronse as pautas establecidas no rexistro do SGIC do centro “DE-01 Programación e Desenvolvemento Estratéxico”. Dada a importancia da posta en marcha dunha estratexia abordada de forma participativa e colaborativa tendo en conta a participación de todos os colectivos de interese, a Xunta de Escola nomeou unha Comisión de Elaboración do PDE con representación de todos os colectivos de interese: estudantado, profesorado, PAS, persoas egresadas, empregadores e representantes da sociedade.

Esta comisión elaborou o documento CERO do programa. Tras un período de exposición pública no que se recibiron varias achegas para a mellora do documento, o Programa de Desenvolvemento Estratéxico da EEME foi aprobado en Xunta de Escola.

Política de calidade

A política de calidade do centro deriva da importancia que ten consolidar unha cultura de calidade no ámbito universitario, da súa consideración como un factor determinante para conseguir a satisfacción das expectativas formativas das súas persoas egresadas e o seu recoñecemento nos ámbitos académicos, profesionais e sociais nos que se integran. Para iso existe o compromiso de empregar todos os recursos humanos e materiais dispoñibles dentro do cumprimento da normativa vixente e en coherencia cos criterios e directrices establecidos. Así se establecen as seguintes liñas xerais que constitúen a política de calidade do Centro:

• Manter unha oferta formativa axustada á demanda, necesidades e expectativas da sociedade, para consolidar altos niveis de calidade nas titulacións do centro, sen renunciar aos fundamentos académicos da Universidade baseados no desenvolvemento do coñecemento do espírito crítico, da capacidade de análise e de reflexión.
• Alcanzar o recoñecemento a nivel nacional e internacional da calidade docente a través da consecución das metas asociadas a indicadores académicos, con especial relevancia aqueles que se relacionan coa satisfacción dos grupos de interese.
• Facilitar a extensión da cultura da calidade e a formación continua en materia de calidade do persoal docente e investigador, persoal de administración e servizos e do alumnado, fomentando a eficacia e continuidade dos sistemas e procesos a ela vinculados.
• Asegurar a implantación, desenvolvemento e seguimento tanto do Sistema de Garantía Interna de Calidade (SGIC) como de todos os procesos vinculados coa calidade que afectan ao centro e ás súas titulacións.
• Asegurar unha docencia, investigación, xestión e transferencia do coñecemento con perspectiva de xénero para remover os obstáculos que impiden unha igualdade real entre as mulleres e os homes.
• Responder ás necesidades do sector enerxético / materiais / minas / auga e alcanzar o recoñecemento da formación das persoas egresadas do centro.
• Responder á responsabilidade do centro en materia de formación de público non especializado.

Obxectivos de calidade

Obxectivos e metas para o curso 2025/2026 (aprobados o 27/03/2025)

---