Unha nova edición destas xornadas co mesmo obxectivo das anteriores: achegar ao alumnado o mundo profesional tal como é, con traxectorias diversas e contadas en primeira persoa.
A IV Xornada “Falamos de futuro?” nace para responder dun xeito directo á pregunta que xorde ao rematar a carreira: e agora que? Tres profesionais que estudaron na Escola contan en vinte minutos en que traballan de verdade, como chegaron ata alí e que lles gustaría ter sabido cando estaban sentados na mesma cadeira. Non hai presentacións corporativas nin discursos xenéricos: hai tres traxectorias que naceron da mesma escola universitaria e que rematan en lugares ben distintos, desde a transición enerxética en Octopus Energy ata a consultoría internacional no Kaizen Institute ou a investigación en enxeñaría de minas na Montanuniversität Leoben (Austria).
A xornada péchase cunha mesa redonda aberta, na que participan tamén persoas egresadas da Escola, para abordar cuestións como a busca do primeiro emprego, o traballo no estranxeiro, o que demandan as empresas ou a conciliación. As persoas interesadas poden deixar xa as súas preguntas e temas de interese no formulario de inscrición, e todas as achegas se trasladarán á mesa. A asistencia é libre e gratuíta.
O programa completo pode consultarse no folleto descargable na zona gris de máis arriba.
ACCEDER AO FORMULARIO DE INSCRICIÓN