Co obxecto de dar a coñecer o mundo dos minerais, a nosa Escola oferta como actividade de divulgación científica un obradoiro de recoñecemento de minerais en dúas modalidades: presencial e virtual

Trátase dun obradoiro manipulativo onde os asistentes aprenden a identificar os minerais máis comúns da natureza partindo das súas propiedades físicas: dureza, raia, cor, hábito etc, así como a súa clasificación, usos, ambientes de formación e onde se poden atopar no campo.

O obradoiro pódese realizar de maneira presencial, nun laboratorio real con exemplares reais, ou tamén na realidade virtual (o metaverso da UVigo), usando lentes de realidade virtual 3D a disposición na Escola.

Programa do obradoiro presencial

Parte teórica: 1 hora

  • Definición de mineral e rocha
  • Clasificación dos minerais
  • Ambientes de formación
  • Propiedades físicas dos minerais

Parte Práctica: 1 hora

  • Recoñecemento de 25 minerais a partir das súas propiedades físicas e/ou a partir de probas sinxelas

O obradoiro impártese nas instalacións da Escola de Enxeñaría de Minas e Enerxía da Universidade de Vigo (ver localización) en grupos de 30 estudantes máximo o primeiro venres de cada mes.

Se estades interesados en participar no obradoiro, de forma totalmente gratuíta, contactade con nós en eme@uvigo.gal ou no telefono 986 812 205.

 

Programa do obradoiro virtual

No obradoiro non presencial propoñemos a identificación de cinco exemplares de minerais en dúas etapas:

  1. Etapa manipulativa na que se determinan seis propiedades diagnósticas (hábito, dureza, raia, solubilidade en ácido, densidade e magnetismo), e
  2. Etapa de investigación na que se investiga que minerais son entre dez opcións diferentes, contrastando información sobre as propiedades e aplicacions.

O obradoiro en modalidade virtual dura unha hora e é apto para grupos dun máximo 16 persoas.

No seguinte vídeo describimos o funcionamento do obradoiro presencial: