A I Olímpiada da Enerxía un éxito de participación e de obxectivos cumpridos

A Escola de Enxeñaría de Minas e Enerxía da Universidade de Vigo acolleu o pasado 9 de abril a primeira edición da Olimpíada da Enerxía. Trátase dunha iniciativa de divulgación científica dirixida a estudantes de 4º da ESO, Bacharelato e Ciclos Formativos de FP de Galicia. O proxecto, financiado pola Fundación Española para a Ciencia e a Tecnoloxía (FECYT) no marco da convocatoria de axudas 2023 do Ministerio de Ciencia e Innovación, nace co obxectivo de fomentar o coñecemento e a comprensión da ciencia e da tecnoloxía asociadas ao sector enerxético, así como de espertar vocacións STEM entre a mocidade.

Durante a xornada, 150 estudantes de 16 centros educativos participaron nunha competición que combinou probas teóricas e prácticas, tanto individuais como en grupo. As actividades incluíron cuestionarios, probas de programación con Arduino, obradoiros de debate sobre retos tecnolóxicos no ámbito enerxético e unha proba de divulgación científica na que o alumnado tivo que explicar a un público non especializado temas relacionados coa enerxía. Ademais, desenvolvéronse obradoiros divulgativos a cargo do profesorado da escola, como Benito Vázquez Dorrío, María Araujo Fernández e Javier López Bértolo.

Tamén destacaron as probas Mulleres Enerxéticas, centrada en visibilizar o papel das mulleres no sector mediante fichas divulgativas, e Fake News, na que os participantes analizaron textos sobre enerxía para detectar información enganosa e elaboraron pósters explicativos. Ambos materiais foron expostos durante o evento. Estas actividades enmárcanse nun dos obxectivos clave da Olimpíada: combater a desinformación científica e poñer en valor o papel fundamental do sector enerxético na sociedade actual, tanto nas súas dimensións ambientais como sociais e económicas.

En vista das valoracións positivas por parte dos participantes e o seu profesorado, pode asegurarse que a I Olimpíada da Enerxía cumpriu coa súa misión: achegar o mundo da enerxía ao público máis novo fomentando os seus coñecementos, a súa curiosidade e, tal vez, espertando as vocacións de futuros enxeñeiros e enxeñeiras. Todo apunta a que esta foi só a primeira edición dun proxecto que veremos repetirse e crecer ao longo dos anos.

 

Entrega de Premios

O estudantado participante nesta I Olimpíada da Enerxía recibiu unha medalla e un diploma de participación, así como un pequeno agasallo da Escola de Enxeñaría de Minas e Enerxía. A maiores repartíronse múltiples premios. En cada unha das seis probas entregáronse tres premios e houbo tamén galardóns para os centros educativos, primeiro e segundo premio a cada categoría –centros de ESO e bacharelato e centros de Ciclos Superiores de Formación Profesional–. Foron 400 euros para os primeiros premios e 200 para os segundos, concedidos ambos polo Colexio Oficial de Enxeñeiros de Minas do NO. Concedéronse tamén Premios Naturgy Renovables aos primeiros centros clasificados consistente nunha visita a unha instalación de renovables deste grupo.

Entregaranse tamén os Premios Enerxéticas, primeiro e segundo premio para as estudantes mellor clasificadas.

Abaixo pódese ver unha galería coa entrega dos galardóns.

 

Mellor Centro de ESO/Bacharelato e Ciclo Superior de FP

Premio Colexio Oficial de Enxeñeiros de Minas do Noroeste de España.

Premio Naturgy

Premios por probas

Premiados/as na proba Test Teórico

Premiados/as na proba kit Arduinio

Premiados/as na proba Divulgación Científica

Premiados Premiados/as na proba Debate

Premiados/as na proba Fake News

Premiados/as na proba Mulleres Enerxéticas

Premio a alumna mellor clasificada

Facendo clic no botón de abaixo vaise á web da I Olimpíada con toda a información do evento e unha ampla galería de imaxes de onde recollemos as fotos e as informacións da entrega de premios.

Ir á web da I Olimpíada da Enerxía