O sector termal galego incide na importancia de protexer a riqueza de acuíferos para evitar a súa contaminación e a sobreexplotación da auga

A directora da EEME incidiu neste ámbito como opción de futuro para o estudantado da escola

Representantes do sector, a Xunta, os colexios profesionais e a Universidade de Vigo antes do comezo da xornada
Representantes do sector, a Xunta, os colexios profesionais e a Universidade de Vigo antes do comezo da xornada

O sector termal galego deuse cita este mércores no campus de Vigo nunha xornada para debater sobre o futuro sostible do termalismo organizada pola Asociación de Balnearios de Galicia. A Escola de Enxeñaría de Minas e Enerxía foi a anfitrioa do evento, no que se reuniron profesionais vencellados ao sector dende diferentes ámbitos, como administración, universidades e  empresas, xunto con estudantes universitarios interesados na compoñente mineira das augas como opción de futuro.

Na inauguración da xornada participou o conselleiro de Economía, Emprego e Industria, Francisco Conde, que foi recibido polo reitor da Universidade, Manuel Reigosa. Xunta a el, a presidenta da Asociación de Balnearios de Galicia, Marisol Espiño; o presidente da Cámara Oficial Mineira de Galicia, Juan de Dios; xunto á directora da Escola de Enxeñaría de Minas e Enerxía da Universidade de Vigo, Elena Alonso. Esta última incidiu en que “as augas minerais e termais son un recurso mineiro e, como tal, unha opción de futuro para os estudantes de Enxeñaría de Minas, como profesionais responsables da realización de traballos de exploración, investigación e explotación das augas. Se a isto lle sumamos a relevancia e peso que ten o sector das augas mineromedicinais de Galicia no contexto nacional, constitúe unha opción profesional moi atractiva”.

Ler a noticia completa no DUVI