fbpx
Escola de Enxeñaría de Minas e Enerxía

Cartel de Minas 2019

Desde fai varias edicións, a Escola de Enxeñaría de Minas e Enerxía da Universidade de Vigo é convidada a participar no Cartel des Mines. Dito evento celébrase en diferentes cidades cada ano. En 2019, IMT Mines Albi, situado no sur de Francia, será a institución anfitrioa da 46ª edición do Cartel de Minas. Durante 3 días, alí reuniranse tódalas Escolas de Minas de Francia (París, Nancy, Saint-Etienne, Douai, Nantes, Ales, Albi-Carmaux) e escolas convidadas como Vigo, Oviedo, Bochum e Emines de Benguerir (Marrocos).

Este acontecemento deportivo e festivo consiste en que preto de 2000 estudantes asistentes compiten nunha ducia de deportes por equipos ou individuais. Nesta edición (2019) os deportes nos que se poderá participar son:

  • Fútbol
  • Baloncesto
  • Voleibol
  • Balonmán
  • Rugby
  • Tenis
  • Cros
  • Relevos tanto de natación como de atletismo
  • Cada ano contase con algún deporte invitado e nesta ocasión serán petanca e escalada

 

Nesta edición tamén haberá actividades máis enfocadas ao lecer como son o concurso de DJs e de FIFA 2019. Converténdose así nunha oportunidade ideal para que as delegacións establezan vínculos nacionais e internacionais e estreitar lazos cos compañeiros da túa escola.

Polo tanto, do 25 ao 28 de abril de 2019 un grupo de estudantes da Escola de Enxeñaría de Minas e Enerxía da Universidade de Vigo viaxará a Albi para participar neste evento internacional e aproveitar ao máximo a experiencia.